آپ کے سوال کے دو جوابات ہوسکتے ہیں مختلف تناظر میں۔
1۔ اسلام کی روشنی میں:۔
اسلام کسی کو بھی حق نہیں دیتا کہ وہ اللہ کے دین میں کسی قسم کی کوئی تبدیلی کرے۔ جو دین اللہ نے اپنے آخری نبی محمدﷺ پر اتارا ہے وہی مکمل ضابطہ حیات ہے۔ اس لیے اسلامی احکامات کی روشنی میں کوئی بھی شخص کسی بھی وارث کو حق وراثت سے محروم نہیں کرسکتا۔ کیونکہ وارث اللہ کی طرف سے مقرر کیے گئے ہیں اور ان میں ردو بدل نہیں ہوسکتا۔ مزید یہ کہ اللہ تعالیٰ نے قطع تعلقی کو حرام قرار دیا ہے۔
ہاں اسلام میں صرف ایک ہی صورت میں کوئی حق وراثت سے محروم ہوتا ہے وہ اس صورت میں کہ اگر کوئی شخص اسلام سے منحرف ہوجائے تو وہ ہر طرح کے تعلق اور وراثت سے خودبخود محروم ہوجاتا ہے۔ اور یاد رہے کہ اسلام سے منحرف ہونے والا شخص اسلامی اصطلاح میں مرتد کہلاتا ہے اور اسلامی احکامات کے مطابق واجب القتل ہے۔
2۔ آئین پاکستان کی روشنی میں:۔
آئین پاکستان کی روشنی میں ہر پاکستانی کو حق حاصل ہے کہ وہ اپنے کسی بھی وارث کو بوجہ نافرمانی یا دیگر کسی جائز وجہ سے حق وراثت سے محروم کرسکتا ہے اور اس سے لاتعلقی کا اعلان کرسکتا ہے۔ جس کے لیے اسے باقاعدہ بیان حلفی دینا پڑتا ہے اور قومی اخبارات میں اشتہار بھی دینا ہوتا ہے۔
