قافیہ:
قافیہ لفظ قفو سے ہے ،جس کے معنی پیروی کرنے اور پیچھے آنے والے کے ہیں۔اردو ادب میں قافیہ ایسے الفاظ کو کہا جاتا ہے جو اشعار میں الفاظ کے ساتھ غیر مسلسل طورپر آخر میں بار بار آتے ہیں۔یہ الفاظ بعض اوقات غیر ضروری معلوم ہوتے ہیں مگر ہٹا دیئے جانے پر خلا پیدا کر جاتے ہیں۔اس لیے ترنم اور تسلسل کو قائم رکھنے کے لیے قافیہ کا استعمال لازم و ملزوم تصور کیا جاتا ہے۔قوافی کو عرفِ عام میں ہم قافیہ الفاظ کہا جاتا ہے،اس کی ایک مثال درج ذیل ہے:۔
؎ ہستی اپنی حباب کی سی ہے
یہ نمائش سراب کی سی ہے
یہاں ”حباب“ اور ”سراب“ قافیہ ہیں۔
ردیف:
ردیف کےمعنی گھڑ سوار کے پیچھے بیٹھنے والے کے ہیں۔ شعری اصطلاح میں ردیف سے مراد قافیہ کے بعد آنے والے وہ الفاظ ہیں جو بار بار آتے ہوں۔ اور یکساں بھی ہوں، مگر ردیف ہر مصرعے میں آئے، یہ بھی لازم نہیں ہوتا۔ یہ بعض وقت غزل کے مصرعہِ ثانی میں تکرار سے بھی آتا ہے۔اس کی ایک اور تعریف یوں بھی کی جاتی ہے کہ قافیہ کے بعد جو الفاظ مسلسل تکرار سے آئیں، ردیف کہلاتےہیں۔ اوپر والی مثال دوبارہ دیکھیں:۔
؎ ہستی اپنی حباب کی سی ہے
یہ نمائش سراب کی سی ہے
یہاں ”کی سی ہے“ ردیف ہے۔
