کسی سافٹ وئیر کو بناتے وقت ہمیشہ وہ اس قدر جامع نہیں ہوتا کہ ہر کسی کے معیار پر پورا اتر سکے اور کسی بھی سافٹ وئیر کو اس کے استعمال کرنے والوں کی خواہش کے مطابق بار بار تبدیل کرنا بھی ممکن نہیں ہوتا کیونکہ ہر کسی کا مزاج یا استعمال کرنے کا انداز مختلف ہوتا ہے چنانچہ کسی بھی سافٹ وئیر کو بار بار ایڈیٹ کرنے کی بجائے کچھ ایسی شاخیں استعمال کی جاتی ہیں جو آسانی کے ساتھ اس سافٹ وئیر کے ساتھ جُڑ کر اس سافٹ وئیر میں وہ خوبیاں پیدا کر دیتی ہے جس کی آپ کو ضرورت ہوتی ہے۔ انہی کو پلگ ان کہا جاتا ہے۔۔۔۔۔۔۔ اس کی مثال میں ایک درخت کی دینا چاہوں گا کہ جب آپ کسی درخت کے پھل سے مطمئن نہ ہوں تو اس سے زیادہ اچھے اور میٹھے پھل والے درخت کی ایک شاخ کو اس درخت کے تنے کے ساتھ پیوند کر کے اپنی مرضی کا پھل لیا جا سکتا ہے۔ بلکل ایسا ہی کام پلگ انز کرتے ہیں کہ آپ کے بنیادی سافٹ وئیر کے ساتھ پیوند ہو کر آپ کو آپ کے مطلوبہ نتائج مہیا کرتے ہیں اور اصل سافٹ وئیر پر بھی اثر انداز نہیں ہوتے۔
