قرآن کہتا ہے کہ اَلَّا تَزِرُ وَازِرَۃٌ وِّزْرَ اُخْرٰی (53:38) کوئی بوجھ اٹھانے والا کسی دوسرے کا بوجھ نہیں اٹھائے گا۔ عدل کا یہ تقاضا ہے‘ یہ کیا جائے گا۔ آگے کہا ہے کہ فَمَنْ عُفِیَ لَہٗ مِنْ اَخِیْہِ شَیْءٌ فَاتِّبَاعٌ بِالْمَعْرُوْفِ وَ اَدَآءٌ اِلَیْہِ بِاِحْسَانٍ (2:178) اس کا ترجمہ یہ ہے کہ جس کو اس کا بھائی یعنی مقتول کے وارثوں میں سے کوئی‘ جس کو کچھ معاف کردے تو وہ ٹھیک ہے‘ وہ اسے ادا کرے اور اس کی کمی کو پورا کرے۔ قرآن کے اتنے ٹکڑے سے ہمارے ہاں ایک ایسا غلط قانون بن گیا ہوا ہے‘ جسے شریعت میں دیت یا خوں بہا کا قانون کہتے ہیں۔ وہ یہ ہے کہ قتل کسی قسم کا ہو‘ وہ جو مقتول کے وارث ہوتے ہیں‘ ان کو اجازت ہے کہ وہ اس قاتل سے کچھ خوں بہا لے کر اس کو معاف کردیں۔ آپ دیکھیے کہ یہ چیز معاشرے میں کتنے بڑے فتنے کا موجب بن جاتی ہے اور بنتی ہے۔ بھائی بھائی کا دشمن ہے۔ وہ اپنے کسی ایک سے کہہ کر اس کو قتل کرا دیتا ہے۔ اب جو مقتول ہے‘ اس کا وارث یہ بھائی ہے۔ اب اس بھائی کو اجازت دیدی جاتی ہے کہ وہ اس قاتل سے کچھ لے کر اس کو معاف کردے۔ ’’ سو روپیے نال سودا کرلیا پلے اوں ای اوہنوں دے کے‘ اپنے کول لے لیا۔ اے معاف ہوگیا جنوں قتل کرانا سی او کرا دتا ٭(26) ‘‘۔ آپ دیکھیے یہ چیز! مقتول کے وارث کو یہ حق ہے کہ وہ قاتل سے براہِ راست معاملہ کرے اور اس سے کچھ پیسے لے لے اور یہ معاملہ ختم ہوگیا۔ آپ دیکھیے کہ پھر ہوگا کیا؟ اس سے کتنی بڑی انارکی (خلفشار) قتل کے معاملے میں پھیل جائے گی۔ کیا یہ خدا کا قانون ہوسکتا ہے؟
